تصويت

شارك برأيــك

المتواجدون حالياً

محرك البحث

موقع سوق الشيوخ ::: الصفحة الرئيسية » الأخبار » أخبـــار ذي قــار

مسامير من خشب ... جبت الاكرع يونسني كشف كرعته وخوفني ... عمكم ابو تايه
تاريخ : السبت 04-09-2010 07:13 مساء

سلام عليكم يالربع ورحمة الله وبركاته رمضان الخير والبركه عليكم وعله كل المسلمين سالفتنه اليوم بيهه اشويه اختلاف واحنه اتعودنه نبديهه ابمثل من امثال اهنه الله يرحم الميتين منهم وايطول اعمار الباجين المثل ايكول (جمل الغركان غطه ) والمثل الثاني ايكول (فوك الحمل تعلاوه ) بس المثل الاضرب من هاي الامثال سمعته من وحده عجوز جانت امسيره اعلينه وهم كمنه انسولف كالت ييمه مثل ذاك اليكول (جبت الاكرع ايونسني كشف كرعته وخوفني ) هسه احنه انوب انسولف وي صاحبنه الكشف كرعته علينه وخنكنه من الحر 00انكله بويه يالشهري استاني ابروح ابوك الناصريه شمسويه وكطعت عليهه الكهرباء كاتله المرحوم جا المرحوم مامات كتل احتركت من الحروره وتوفه ماكتلوه اهل الناصريه جا انته يوم كطعت اعلينه الكهرباء ابشهر رمضان اشكالتلك روحك ماكلت اهل الناصريه بيهه وادم صيام والدنيه حاره وهذا شهر تموز والدنيه تصلخ المطي خايب حته ماي ماكو نسبح بيه الله واكبر بس انته عود ابهاي سويت زينيه عود حته المالكي اذا صار مره ثانيه ريس وزراء ايكلك عفيه زين سويت وي اهل الناصريه اعطوه الف دينار واذا كلك عفيتين انته ابخير لان متعود عله العفيات من زمان ولك الله واكبر ماتخاف من الله والله لو تجي السوك الشيوخ اسبوع ماتظل ابراسك شعره من الحر تنصلخ صلخ بس احنه مايهمنه الحر لان احنه اولاد الصدر والحكيم تعلمنه من نطب السجون الملعون مانعرف الشته من الصيف كلهه عدنه سوه بس احلفك با لحسين والعباس ولو انته ماتعرفهم الكهرباء هم تنكطع ابيتك وجهالك يتهفون ابكارتون ؟  الديزل الضخم الجبير هم يعطل وتسكت المكيفات الي ابيتكم  ؟ هم اجه يوم من الايام ابوالديزل كطع عنك الكهرباء لان ماعندك تدفع افلوس الامبيريه ؟ ادري بيك ماراح تحلف لان اتخاف ايشورون بيك لان اهم مظلومين ويضوجون من الظالم وابساع ايشورون بيك وما تصير وزير بالحكومه الجديده ولو صاحبك ماراح ايصير ريس وزراء وانته ماتدوملك الكهرباء لان بشر الظلم بالظلم ولو علحكومه الجايه  احنه نتحمل لان جاينه الشته ونرجع للبطل والفوانيس00 والدفو البطاطين اهوايه ونتكبع وندفه واشكد حلوه لو واحد ايسير للديوان ومتكبع ابطانيه بدل العبايه لان انته هم وزير النفط وبالشته تكطع النفط والغاز عله اهل الناصريه ليش يابه لان ايسوون دخان وتتلوث البيئه  واتصير كبة المطال بمية الف دينارولكم هذا حجي الله اكبر جااحنه كل ما جالنه نتقدم لونرجع لوره والله ماقصرت يالشهرياستاني راح انفصل اهدوم جلد ونرجع للعصر الحجري وانسميه العصر المقراطي الحديث احنه موصوجنه انتم كلتوا مقراطيه وهم طلعت اهل الناصريه اتمقرط جانته اشمالك ضجت وكطعت اعلينه الكهرباء هم زين حطوك وزير  الكهرباء لو حاطينك مجان اسرافيل جا كطعت الهوه 00بس انكلك موصوجك صوج الي انتخبك وغط اصبعه ابهذا الزفت الاسود 0000 واتعذروني كلش هالمره لان اسولف والحر عماني                     عمكم ابو التايه

مرات القراءة: 440 - التعليقات: 5

المشاركة السابقة : المشاركة التالية

الكاتب: زهراء	[بتاريخ : الأحد 05-09-2010 12:06 صباحا ]
هذا البــنـفسج الزاهي وليس الزفت عمي أبو تايه لا .لا عمي ابو  تايه ، إذا عندي لو عندك عتب لو مشكله ويـه وزير الكهرباء بالوكاله أو ويه وزير الطاشوشات ، ارجوك عمي   لا تشتم 12مليون عراقي تخضبت اصابعهم  بحبر الحريه مو بالزفت . أرجوك عمي اعتذر للشاركو بالانتخابات  تره والله نقاطع سوالفك الحلوه              بت اخوك زهراء   -------------------------------------

الكاتب: واحد مستلك من الحروعاطل عن العمل	الله كريم [بتاريخ : الأحد 05-09-2010 12:32 مساء ]
يمعودين هاي ياحرية تحجون بيها جا اخاف صدكتوا عله كولة الكاتب بالمقراطية يمعودين اطونا كهرباء واخذوا الزفت البنفسجي الكم مو استلكت اهلنه واطفالنا من الحر السمط عمي الايده بالنار مثل الايدة بالنار بس ماتجوي النار الا الرجل واطيها والله كريم اذا مانووت من الحر نموت بغير شي تعددت الاسباب والموت واحد.والكاتب هنا وضح عيشتنه بهاي كلماته السهله البسيطة وبعد اكو داعي للتعليق -------------------------------------

الكاتب: احمد الربيعي	رد [بتاريخ : الأربعاء 08-09-2010 04:24 مساء ]
بصراحه من اشوف او اسمع الشهرستاني يقشعر بدني لاني متاكد انه خادم صغير للمالكي وغير المالكي من اجل البقاء بمنصب وزير النفط او اي منصب اخر حتى لو على حساب العراقيين..ومو بعيده عمالته حتى لاسرائيل..هؤلاء لايتوانون عن اي شئ حتى اذيه شعبهم من اجل المنفعه والا لايوجد انسان وطني بدلا من اصلاح الكهرباء يطلب من العراقيين (التكوم بغرفه وحده) وتشغيل مبرده وحده..ونحن نعلم انه لايرضاها على نفسه..انشاء الله نشوف بيهم يوم مثل يوم صدام اللعين اللي تعلموا منه هاي السوالف..انشر ياموقع ولا تحسب للحزازيات الحزبيه واخدم وطنك -------------------------------------

الكاتب: ام قمر هاشم	الثلاثاء /21/9/2010 [بتاريخ : الثلاثاء 21-09-2010 11:46 صباحا ]
الى جميع القرأء الكرام ..... الى اختي العزيزة زهراء ..... ارجو منكم جميعاّ تعذرون عمي ابو تايه ! لان بصراحة كل احنة تعبنه من هاي القضية .والله وحتى ملينه مايصير يجي جلاد اقوى واقسى من جلاد الى متى ......! وحك لو يحجي على الحبر البنفسج لان غلطنه غلطة عمرنا وانتخبنا هل الاشخاص الكانو مو اهل الثقة  فتحول الحبر البنفسج الى سكين ضربة اعناقنه والله ملينه والله يصبرنه على مابلانه ونتحمل والسفينه تمشي وضاع القبطان . سلامي الى جميع المشتركين . اختكم ام قمرهاشم -------------------------------------

الكاتب: احمد الناشي	22/9 [بتاريخ : الأربعاء 22-09-2010 09:21 مساء ]
عمي ابو تايه تمنيت اشوفك لو اعرفك وانه حسب تصوري انت كاتب مسيطر لكن مليت من كتابة التمنطق وكمت تكتب مثل سوالفنه والله عاشت ايدة انريد منك بعد اكثر وكل واحد حط طينته اخده                         المعجب كلش  ///    احمد الناشي -------------------------------------

أعلانات

جديد الموقـع

آراء وافكار

لايحتمل التأجيل

تاريخ سوق الشيوخ

الصوره تتحدث